ስርሑ ጀሚሩ ዶመዝ ምስ ጀመሮ
ንበይኑ ነይበልዖ ንበይኑ ነይገበሮ:
ኣሕዋቱን ዘማተቱን ኣብ ሓደ ኣኪቡ
ዝረኾቦ ዘኻፍል ስኢኑ ረኪቡ:
ህይወቶም ዝተንከፎም ኣለው ብዙሓት
ዝምስክሩ ኩሉ ከምዝገበሮ ብትሕትና ብዘይ ኩርዓት:
ገጽ ብገጽ ዝዛረብ ሕሜታ ዘይፈቱ
ናይ ካልእ ዘይፈቱ በላዕ ናቱ:
ዓለም ፍሽክ እንተዘይበልካያ
ካብኡ ይሕለፍ ትብለካ ኮርያ
ዝሃብካና ትምህርቲ እምነ መሰረት ዓቢ ሞያ:
ህይወትካ ሕጉስን ኣወንታውን ብዙሓት ዝተንከፈ
ብግቡእ ተጠቂምካሉ መዋእልካ የለን ዝተረፈ:
መጽሕፍቲ ኣኪብካ ዘወፈኻዬ ንናይ ካምቦኒ ላይብሬሪ
ሃናጺ ንመንእሰያት ኮይኑ ኣሎ መምሃሪ መመራመሪ:
ፍኖተ ብርሃን መዕበይ ዘክታማት ዘይርሳዕ ሓድጊ
ስለ ጽቡቕ ግብርካ ኣብ የማኑ የቀምጥኻ ኣቦይዝጊ:
ወናኒ ብሩህ ኣእምሮ ኣብ ደቂቕ ዘይግደስ
ብዓል ዓቢ ሓሳብ ከም ሶቅራጥስ:
ፈታው ኩሉ ህዝቡ ዳላይ ፍቕሪ ዳላይ ሰናይ
ሓግዘኒ ንዝበሎ ዘይፈልጥ እምብለይ ንኩሉ ሕራይ:
ድኻ እንተተበደለ ነይድቅስ ነይቀስን
ርትዓዊ ፈታዊ ጥበብ ከም ንጉስ ሰለሙን:
ለባም መስተውዓሊ ዘይታለል ብብሩር ብወርቂ
ጥቕሚ ህዝቢ ዘቐድም ዘይግደስ ብናይ ውልቂ:
ጽቡቕ እንተረኣየ ይሕጎስ ተደሪሩ ይሓድር
ጽርግያ ክሕደስ መስመር ማይ ክዝርጋሕ ኣበርቲዑ ዝጽዕር:
ሰብ ኮርዩ ሰላም እዝጊሄር እንተቕበጸ እንተኣበየ
መምህር ሓደርካዩ ዝብሎ ከይዘንግዓ ከይደንጎየ:
በል መምህር ሓዲካና ካብ ከድኻ ናብ ርሑቅ መገሻ
ጣዕምኻን ማዕዳኻን ኾይንና ኣሎ ውርሻ:
ህይወትካ ዝተንከፈ ንዓቢ ንንእሽቶ
ኩሉ ጻዕዳ ይጽናሕካ መንግስተ ሰማይ ብድሓን እቶ።
መምህር በረከት ቀልኣብ